सत्ताको दुरुपयोग भएकै कारण मुलुक माथि उठ्न सकेको छैँन :अध्यक्ष लिङ्देन

काठमाडौँ / राष्ट्रिय प्रजातन्त्र पार्टीका अध्यक्ष राजेन्द्र लिङ्देनले अस्थीरकताका कारक दलहरु नै अहिले सरकारमा रहेको बताएका छन् ।

राप्रपा केन्द्रीय सल्लाहकार समितिको बैठकलाई शुक्रबार काठमाडौंमा सम्बोधन गर्दै लिङ्देनले ठूलो दलको रुपमा जनताको मत प्राप्त गरेका र अहिले सरकारमा रहेका दलहरु नै अस्थीरकताको प्रमुख कारक भएको बताएका हुन् । उनले अहिले ठूला दलहरु मिलेर दुई दलीय व्यवस्था कायम गर्ने परिकल्पना सामान्य बिषय नभएको जिकिर गरे । लिङदेनले सत्ताको दुरुपयोग भएकै कारण मुलुक माथि उठ्न नसकेको बताए । अव पनि राप्रपाजस्तो पार्टी शक्ति बलियो बनेर नआउने हो भने देश दिर्घकालीन निराशाको खाडलमा जाने र जस्तोसुकै अराजकता उत्पन्न हुने उनको भनाइ छ ।

उनले अहिले अभिभावकको रिक्ततालाई राप्रपाले नेतृत्व लिएर अन्त्य गर्नुपर्नेमा जोड दिए । लिङ्देनले अहिलेको प्रणालीमा व्यापक परिवर्तन गर्नुपर्ने भएकाले राप्रपाले ठीक ढंगले आफुलाई अघि बढाउनुपर्ने उल्लेख पनि गरे ।

राप्रपा पनि निष्कृय भए देशका लागि दुर्भाग्य हुने उहाले बताउनुभयो । उहाले सदनमा राप्रपाले ठीक ढंगले आफ्नो काम गरिरहेको जिकिर गर्नुभयो ।